يعاني طلاب محافظة الفيوم، من عدم تهيئة المدارس لاستقبالهم، وهو الأمر الذي ينعكس بشكل سلبي إلى حد كبير على سير العملية التعليمية بالمحافظة.
ففي أول يوم دراسي، على سبيل المثال، أغلقت أبواب المدارس، في العديد من مناطق الفيوم، في وجه الطلاب؛ بحجة الصيانة وعدم تجهيز الفصول للدراسة.
وفي ثاني يوم دراسي، شاهد الطلاب كم الإهمال بالمدارس؛ حيث لا يوجد دورات مياه ببعض المدارس، وإن وجد فتكون غير مهيأة للاستعمال الآدمي، وتواجد بيوت العناكب في الفصول والأتربة، والمقاعد مكسرة، والسبورات عليها كتابات لا تمسح، ونقل الطلاب من مدارسهم إلى مدارس أخرى بعيدة.
وشاهد الطلاب أيضًا، حالة من الفوضى واللامبالاة من قبل إدارات المدارس والمدرسين؛ حيث أبواب المدارس مفتوحة لمن يريد الخروج وعدم شرح المدرسين، واشتكى طلاب الصف الثالث الثانوي من عدم وجود مكان لهم للدراسة.
وفي تصريحات خاصة لـ”رصد”، قال خالد عبدالرحمن، مدرس: “احنا كمدرسين عايزين نشرح، لكن الفصول مش نظيفة علشان ندخلها، وبعدين السبورات مش بتتمسح والطلاب جايبين العيب عندنا”.
فيما قال عمر حسين، طالب: “أنا في أولى ثانوي ما أخدتش ولا حصة لحد دلوقتي وباب المدرسة مفتوح للي عايز يروح، أنا دلوقتي بقالي يومين آجي المدرسة أفطر وأروح”.
وأوضح عويس محمد، طالب، قائلًا: “أنا مش في مدرسة أنا في ملاهي أنا باجي المدرسة علشان ألعب شوية، وطبعًا المفروض دلوقتي آخد دروس خصوصية في جميع المواد”.
فيما قالت مريم عبدالحميد، طالبة: “أنا طالبة في مدرسة الثانوية التجارية، رحت المدرسة قالوا المدرسة اتنقلت لمدرسة الثانوية بنين فترة مسائية علشان المدرسة عايزة صيانة واحنا مش عارفين نعمل إيه”.
قال أيمن فتحي، طالب: “أنا في تالتة ثانوي مليش فصل في المدرسة علشان آخد فيه الحصص وقدمنا شكاوى والطلاب بتوع السنة اللي فاتت قدموا شكاوى ومفيش أي نظرة عطف حتى لينا من المسؤولين”.
