في أول تعليق له على اتهامات رجل الأعمال محمد علي، أطلق عبد الفتاح السيسي العديد من التصريحات التي أثبت فيها حديث المقاول المنشق، والتي أثارت الجدل على مدى الأسابيع الماضية.
وقال السيسي في رده خلال جلسة تحت عنوان «تأثير نشر الأكاذيب على الدولة في ضوء حروب الجيل الرابع» في النسخة الثامنة لمؤتمر الشباب، «في ناس بتسأل الحاجات اللي اتقالت دي عملتها ولا لا ، اللي بيني وبينكم الثقة، مش أني اكبر من المساءلة أو اني مش عاوز ارد على كلام يتوجه لي، قالوا إني ببني قصور رئاسية أنا بنيت وببني وهبني ، ومفيش حاجة باسمي، كله للدولة»
وأضاف السيسي أن تلك الأخبار تؤثر على صغار الضباط قائلا: «مش خايفين على الضباط الصغيرين أنهم يتهزوا بسبب ما يقال على قيادتهم الجيش مؤسسة مغلقة وحساسة لما يقال على القيادات»
وتابع: « أيوة أنا بعمل قصور رئاسية وهعمل أكثر أنا بابني في العاصمة الجديدة دولة جديدة الدنيا كلها هتتفرج عليها، عشان القصور اللي موجودة في مصر متكونش بتاعة محمد علي بس»
وأشار السيسي إلى:«العلاقة بيني وبين الناس مبنية على الثقة، لو حد حب يضربها دي حاجة خطيرة، بيقولوا إني بعمل قصور جديدة، أنا بعمل قصور في العاصمة الإدارية الدنيا كلها هتتفرج عليها، أمال إيه، هي مصر شوية ولا إيه، انتوا فاكرين مصر شوية أنا مش زعلان من الكلام أنا خايف عليكم»
وقال السيسي: «أنا قلت للأجهزة الأمنية إن اللي بيني وبين الناس الثقة، هما مصدقيني، ولما حد ييجي يلعب في الحتة دي، دي أخطر حاجة في الدنيا».
وأضاف قائلًا: «لما حد يشكك فيا أقول أنا إيه للست الكبيرة اللي بتدعي لي، أسيبها محتارة؟ أنا سبت الموضوع ده خالص، لكني استفدت من كلامكم إني أفتح الموضوع ده بشكل مناسب، الحقيقة أكبر مننا، أكبر مني أنا».
وقال: «النبي محمد كان يقول: ما بال قوم على أي موضوع يطرح ويكون محل تساؤل، أنا استفدت من النقاش ده، أنا بقول لكم إن أي إنجاز بنحرزه بيعقبه إجراء، يا عملية إرهابية حية، يا عملية بالشكل ده».
وأوضح السيسي قائلًا: «هذا الأمر شغلني، لإنكم بتهزوا علاقة كبيرة اتشكلت على مدى 7 سنين، وأنا لما رحت الرئاسة قالوا لي: تحب تتغدا إيه؟ فسألت ليه قالوا لي: أصل كل اللي في الرئاسة بيتغدوا على حساب البلد بالقانون، قلت لهم: طب والله لا أنا ولا اللي في الرئاسة، كل واحد ياكل على حسابه».
قال: «كل الهدايا اللي جتلي قد الأرقام دي ألف مرة، ومعملوها متحف اسمه متحف مقتنيات الرئيس، كل حاجة اتعكملت وكل حاجة اتقالت في الأسبوعين اللي فانوا دول كان الهدف منه تحطيم إرداتكتم وفقدان الأمل، وهذا خطر كبير جدًا على بلدنا».
أضاف: «ابنكوا (السيسي) إن شاء الله شريف وأمين ومخلص، والله ده مش رد على حد، ده تأكيد لمعاني وقيم معروفة عني من زمان أوي، الجيش يعرف عني كده، لكما تقول عكس كده يبقى ده كلام خطير».
تطرق إلى القصور الرئاسية قائلًا: «أنا عامل قصور رئاسية، وهعمل، هي ليّ؟ أنا بعمل دولة جديدة، أنتوا فاكرين لما تتكلموا بالباطل هتخوفوني ولا إيه؟! لأ ده أنا هعمل واعمل واعمل، ومفيش حاجة باسمي، ده باسم مصر».
أضاف: «أنا مش زعلان، وأنا متوقع ده، من أول ما اتوليت والكلام ده بيتقال، لكن المهم إنكم تكونوا متطمنين، متقلقوش إحنا مبنسمحش في مؤسسات الدولة باللي مش كويس، وممكن يكون في حد مش كويس، لكن إحنا مش بنسكت عليه».
مضى قائلًا: «أرجو بالإجابة دي أكون مدخلتش في تفاصيل كبيرة، عشان الزملا في الأجهزة الأمنية ميزعلوش مني، عشان هما بقالهم 10 أيام بيبوسوا إيدي ويقولوا لي (لأ)، وأنا متفهم، لكن أنا بقول لكم إن العلاقة بيني وبين الناس اتبنت على حالة معينة، لو حد حب يضربها ده أخطر ما في الموضوع».
