هاجم المذيع المقرب من النظام سيد علي، وزير الداخلية، اللواء مجدي عبدالغفار، قائلًا “الشارع اللي فيه مصلحة السجون مقفول وممنوع الدخول والخروج، وعربيات السادة الضباط قافلة الطرق، اللي عايز يروح حتة يلاقيها مقفولة، كل قسم شرطة في القاهرة قفلوا الشوارع المحيطة به، ويقولك تأمين، هو ده الأمن بتاعنا”.
وتابع “علي”، في برنامج “حضرة المواطن”، المذاع عبر فضائية “العاصمة”، الأربعاء: “إذا كنت محتاج دروس في كيفية تأمين منشآتك.. فأنا خايف على منشآتي، سيادة الوزير النهاردة الرئيس قالك إن اللي بتعملوه ده قديم أوي، لما حضرتك توقفلي ألف جندي حوالين منشأة، ما عشان إحنا اللي بندفع، أكل وشرب ومرتبات، إنت يعني بتدفع منين غير مننا”.
وتابع: “على فكرة يا سيادة الوزير إحنا مبقناش بنخاف، الخوف راح من عندنا، كان زمان أي حد فينا بيخاف يتكلم مع مأمور، النهارده إحنا بنكلم وزير الداخلية وبنقوله إنت اتعلم عليك”.
واستكمل: “فشل وراؤه فشل وراؤه فشل وإحنا قاعدين بندفع الثمن وساكتين، هو وزير الداخلية ليه مش بيتغير؟ راجل محترم وله تاريخ وأصاب وأخطأ ، لكن وزير الداخلية فشل كثيرًا وفي كل مشكلة حدثت كان الأداء غير جيد”.
