يعاني سكان مركز ومدينة إيتاي البارود التابع لمحافظة البحيرة، من تعدي أصحاب المحلات التجارية والباعة الجائلين على الطرق الرئيسية بالمدينة، وسط تقاعس المسؤولين، وغياب شرطة المرافق عن المشهد.
انتقلت كاميرا “رصد” لنقل معاناة أهالي المدينة الذين حملوا مجلس المدينة وشرطة المرافق المسؤولية عن تلك الأزمة.
وقال أحمد الشيمي أحد سكان المنطقة: “كل ما شرطة المرافق تنزل، قبلها بكام يوم حد من شرطة المركز أو مجلس المدينة يبلغ أصحاب المحلات دي، ووقت الحملة ماتلاقيش حاجة من اللي إنتم شايفينها دي”.
وعلق خالد رميح: “ما دام في رشاوى وفلوس لسه بتندفع، يبقى هنفضل على الحال ده لحد لما يكون في أمانة في العمل”.
وأضافت رشا رجب: “مجلس المدينة قال إنه هيجهز لهم مجمع أسواق والكلام ده من 2014، ولحد النهاردة مافيش أي حاجة اتنفذت، وكل ما حملة تنزل، اللي ليه ضهر من الباعة وأصحاب المحالات ماحدش بييجي ناحيته”.
وأشار محمد حجازي: “كل يوم بعاني وأنا طالع من بيتي رايح لشغلي، وكل ده بسبب الباعة الجائلين وغياب المسؤولين عن وضع حلول لتلك المشكلة”، وأضاف: “المعاناة الأكبر نعاني منها على كوبري البحر، الذي يعتبر شبه مغلق من قبل الباعة، خلي المسؤولين نايمين في العسل”، وناشد المواطنون جميع مسؤولي المحافظة بضرورة وضع حل لتلك الأزمة ومحاسبة كل مقصر.
