طالب الإعلامي الساخر، باسم يوسف، بضرورة محاسبة الدولة أولًا، قبل مطالبة الشعب بالتبرع، قائلًا: “مافيش حد أبدًا ممكن يستخسر إنه يقوم يصبح على بلده بجنيه وعشرة ومية كمان”.
وأضاف يوسف في منشور له عبر حسابه الرسمي على موقع التواصل الاجتماعي “فيس بوك”: “بس قبل ما تطلبوا مننا ده تعالوا نتحاسب”.
وتابع: “نتحاسب على “التصبيحة” بتاعة الـ٦٤ مليار جنيه بتاعة قناة السويس اللي قلنا إنها فلوس في الأرض وإننا مش محتاجينهم دلوقتي وإنها هتسحب الاحتياطي المصرفي بتاع الناس في ظل تباطؤ الاقتصاد العالمي وهنبلس في الحيط، والنتيجة؟ لبسنا في الحيط علشان خلصنا دولارات البلد على حفر على الناشف دون أي عائد حقيقي”.
وقال: “نتحاسب على صرف مبالغ مرعبة على بناء سجون هي الأكثر والأكبر في قارة إفريقيا والصرف على منظومة أمنية أقل ما توصف إنهم مش بوليس دول مافيا بتعذب الناس وتحبسهم وترعبهم في بيوتهم، يعني ينفع أصبّح عليك بجنيه تصبح عليّ برصاصة؟ ينفع تحبس أهالي الناس وأصحابهم وتقول لهم صبحوا؟ ما يصحش كده”.
وأضاف: “نتحاسب على فلوس مبارك اللي أوروبا باست إيدينا عشان نرجعها، لكن لا، إزاي؟ إحنا نسحب منك جنيه على الموبايل ونصيبنا خالص من مليارات المفروض هي حقنا”.
وأوضح: “نتحاسب على الملايين اللي اتصرفت على أكبر نكتة في العصر الحديث “جهاز الكفتة”، المراكز اللي اتجهزت والمصاريف المرعبة اللي انصرفت على كذبة ماحدش اتحاسب عليها لغاية دلوقتي”.
وعلق قائلا: “نتحاسب على الفلوس اللي اتصرفت على رفع مرتبات ومعاشات وبدلات ومكافآت القضاء والعسكريين والشرطة مرة واتنين وتلاتة، قول لهم همّ يصبحوا على مصر، ونتحاسب على الضرائب اللي بالمليارات اللي مش بتدفعها أكتر من جهة سيادية واللي أثبتها تقرير الجهاز المركزي للمحاسبات، لكن طبعا الجهاز عميل وإخوان فمش هتاخد على كلامه”.
كمال طالب يوسف، بضرورة محاسبة مشاريع الجيش قائلا: “نتحاسب على الكهرباء والميه والضرائب والرسوم اللي مش بيدفعها الجيش على مشروعات استثمارية وبالقانون وآخرها ٦٤ منشأة تم إعفاؤها من الضرائب وش كده منها دور حضانة ومطاعم وفنادق، يعني مش بس همّ مش عايزين يصبحوا لا دول بياخدوا مميزات وأفضليات على أي مستثمر في السوق ومش هيقدر ينافسهم، فأنت ولا صبحت ولا خليت الاستثمار في حاله”.
وأضاف: “نتحاسب على الفلوس اللي ضاعت من مصر بسبب هروب السياح منها عشان إنت طلعت ضربت سياح بطياراتك في الصحراء وعذبت طالب طلياني وقتلته وفلقتنا بالأمن والأمان ومش عارف تأمن مطاراتك فانضربت طيارة واتفضحت في العالم كله، شوف بقى السياحة كانت هتصبح بكام؟”.
وأنهى باسم يوسف المنشور قائلًا: “فيه خمسين حاجة تانية نتحاسب عليها من أول الـ٣٠ مليار بتوع الخليج للمؤتمر الاقتصادي للعاصمة الإدارية قبل ما تقولنا صبحوا بس الواحد زهق إنه يكرر نفس الكلام”، وأضاف: “فتعالى نتحاسب على اللي فات ده الأول قبل ما تشخط فينا وتقول لنا نصبح أو تضطر يا عيني تبيع نفسك”.
