نشر الشاب المصري “محمد إسماعيل” 20 معلومة يحتاجها أي مصري يفكر في زيارة تونس، وجمع خلالها خلاصة 5 زيارات قام بها خلال عام ونصف العام.

ونشر “إسماعيل” الـ20 معلومة عن تونس عبر صفحته الرسمية على موقع التواصل الاجتماعي “فيس بوك”، من خلال قالب كوميدي؛ حيث حاز المنشور إعجاب الكثيرين من رواد مواقع التواصل الاجتماعي، والتي وصلت حتى الآن إلى نحو 24 ألف إعجاب بالمنشور، وأكثر من 10 آلاف مشاركة له.

وقال “إسماعيل” في منشوره: “التوانسة يعرفوا عادل إمام وسعيد صالح ومسرحياتهم أكتر منك كمصري.. عادي جدا تلاقي واحد صاحبك أو سواق تاكسي حافظ مسرحية مدرسة المشاغبين أو العيال كبرت أو الزعيم عن ظهر قلب وبيسمع لك كل الإيفيهات”، مضيفا: “لو أنت كمصري راكب ميكروباص “لواج” أو الترام وجالك تليفون يفضل إنك ماتردش عليه، لإنك لو رديت بلهجتك المصرية هتلاقي كل الناس سابت اللي بتعمله وهتتفرج عليك، ولو فيهم بنات هيبدؤوا يضحكوا عليك.. لما تسألهم بتضحكوا ليه؟ الرد بيكون: أصلك بتتكلم زي التليفزيون”.

وأكمل “إسماعيل” منشوره: “لو قررت تشتري ساندويتش من أي مطعم وانت مابتحبش الأكل الحار “سبايسي فود”.. مش كفاية إنك تقول للي بيعمل السندويتشات مش عايزه حار، أو مش عايز هريسة “شطة”.. أنت لازم تبوس فوق راسه 10 مرات وتتوسل له علشان يقتنع بطلبك، وإلا هتقضي باقي عمرك تعالج في القولون”.

واستطرد: “لو شاب تونسي عرف إنك مصري وسألك “إنت أهلاوي ولا زملكاوي؟” وإنت أهلاوي.. اوعى تتسرع وتقع في الفخ وتجاوب على سؤاله.. الإجابة المثالية هي “أنا ماليش في الكورة وباشجع منتخب مصر للباليه المائي وهوكي الجليد grin emoticon”، لأنك لو قلتله إنك أهلاوي فهو أكيد بيشجع الترجي أو الإفريقي أو النجم الساحلي أو الصفاقسي، وده هيأثر على صداقتكم”.

وجاءت بقية المعلومات عن تونس في المنشور بحسب ما قاله “إسماعيل” كالتالي:

“ممكن عادي جدا تكون بتكلم أستاذ في الجامعة أو أم واحد صاحبك أو بنت زميلتك في غاية الأدب والخجل وتلاقي حد منهم بيقولك بكل هدوء “ما تتمنيكش علي”، آه زي ما سمعتم كده.. الناس دي محترمة وزي الفل وبيبقى قصدهم “ما تتريقش عليا” مش أكتر.
– الحصول على أي من المنتجات التالية على أرض تونس شبه مستحيل: الجبنة الرومي والبسطرمة والجبنة الفيتا واللب السوبر والخيار.. لو تعرف حد مسؤول وليك واسطة كبيرة في البلد ممكن تعرف تلاقي معلبات فول مدمس.
–  لو قعدت مع شباب توانسة ليهم في السياسة هتلاقيهم حافظين قصائد أحمد فؤاد نجم وأغاني الشيخ إمام أكتر من أي حد قابلته في مصر.
– نص الأكل التونسي عبارة عن تونة “تن” وبيض نصف مسلوق “عضم” وشطة “هريسة”.. تقدر تحط عليهم أي حاجة تانية وتطلق عليه اسم أكلة.
– البنات هنا في تونس حقيقي شيك وستايلش. أحلى حاجة لما تقول لواحدة تعرفها انتي شيك النهاردة فترد عليك وتقولك “يعيشك وإنت زادا” يعني شكرا وانت كمان.
– في المعاملات الرسمية فيما يتعلق بالشغل في ناس بتستعمل كلمة “سي” للاحترام زي ما بنستخدم كلمة أستاذ في مصر.. يعني يجيلي تليفون ساعات من واحدة تقول لي “سي محمد إسماعيل؟”.. لا إراديا بتخيل نفسي سي السيد وبحس إن أمينة بتكلمني وبلاقي نفسي حاطط رجل على رجل وأنا بارد عليها؟

– لو حد تونسي مشفش مصريين قبل كده وشافك للمرة الأولى.. فأنت كمصري عليك واجب وطني والتزام أخلاقي إنك تضحكه.. مصري يعني بيهزر وبيضحك… لدرجة إنك ممكن تكون بتتكلم عادي جدا وهو فاكرك بتهزر ويقعد يضحك.. كمل عادي زي ما إنت.
– تلاقي كتير في الشارع محلات مكتوب عليها “فواكه جافة”.. دي محلات بيتباع فيها كل حاجة إلا “الفواكه الجافة”.. هي أكشاك أو محلات بقالة بس مش عارف سبب التسمية.
– العربية “السيارة” هنا في تونس اسمها “كرهبة” وجمعها “كراهب”.. ومتفكرش تعمل فيلسوف وتسأل حد تونسي وتقوله إيه علاقة كلمة كرهبة بالسيارة.. لإنه رده هيكون جاهز وهيقولك “وإيه علاقة كلمة عربية بالسيارة”، وهيبقى شكلك وحش.
– لو عطشت وفكرت تشرب حاجة ساقعة وروحت كشك وقلت له عايز “كولا”.. هتلاقيه جايبلك صباع لزق “صمغ”.. لغاية ما توضح له أكتر إنك عايز “كوكاكولا”.. أو تبقى تقول “كوكا” من الأول وتشتري دماغك.
– لو مسافر من تونس لبلد تانية على الخطوط التونسية وطيارتك الساعة 10 مثلا.. ممكن تروح المطار الساعة 11 وتلاقي الطيارة لسه مطلعتش عادي جدا.
– لو واحد تونسي خبط في كتفك بيقولك “سامحني” أو “يا ستار”.. ولو قلت له انك تعبان أو سمع خبر وحش يقولك “اللطف عليك”.
– عادي جدا إن تونسى يسألك: هو عدد السكان في مصر بقى كام دلوقتي؟ أو عدد سكان القاهرة؟ غالبا هو بيكون عارف الإجابة بس منتظر ردك علشان يخبط كف على كف ويضحك ويقولك: أنتو عارفين تعيشوا مع بعض إزاي؟
– زوز “يعني اتنين”، هاكا “يعني كدة”، بنين “يعني حلو”، دابوزة ماء “يعني إزازة ميه”، جازوز “يعني حاجة ساقعة”، مونجيلة “يعني ساعة”، نهج “يعني شارع”، سافا “كويس”، بابيه “مناديل”، توة “يعني دلوقتي” وحاجات تانية كتير.
– عادي جدا أن صاحب محل أو سواق تاكسي أو أي حد تقابله بالصدفة يطلب رقمك ويقرر يعزمك عنده في البيت على أكل تونسي و”يفرح بيك” زي ما التوانسة بيقولوا لمجرد إنك مصري.
– التوانسة شعب جميل.. بيحبوا الحياة ومتحضرين وتقدر تلمس ده في أغلب تعاملاتهم معاك وخاصة مع المصريين.. اللي بيخطط لأجازة وبيفكر يزور تركيا أو أوروبا ييجي يزور تونس هيصرف فلوس أقل وهيتبسط حقيقي لو مهتم إنه يعرف ثقافة تانية ويزور بلد جميلة مايحسش فيها إنه غريب.