يعاني أهالي محافظة الفيوم، من أزمة كبيرة في انقطاع الكهرباء؛ إذ تصل مدة الانقطاع في بعض القرى إلى 12 ساعة، وسط تجاهل تام من المسؤولين.

يأتي ذلك على الرغم من أن أعمدة الإنارة تعمل في وضح النهار، مما أثار غضب المواطنين واستياءهم الشديد، مما وصفوه بـ”استهتار الحكومة بالمواطن الغلبان”، نظرًا لتعنتهم في قطع الكهرباء في المساء وإضاءة أعمدة الإنارة في الصباح.

وقال محمود سعد، صاحب محل بقالة: “الكهرباء قطعت 10 ساعات عندي وافسدت الأيس كريم والزبادي، والجو أصلًا مش مستحمل، والبضاعة كلها بتبوظ والمحل ده مصدر رزقي الوحيد، لما كل يوم ارمي الحاجات دي هأكل ولادي منين”، مضيفًا أن المشكلة لا تقتصر على محلات البقالة فقط، بل أثرت أيضًا على مزارع الدواجن مما تسبب في موت الكثير منها بسبب شدة الحرارة.

وأضاف أحمد محسن “الكهرباء بتقطع عندي في بعض الأيام من الساعة 1 الظهر لحد الساعة 2 بالليل، حرام ده ميرضيش حد، وبالرغم من كده بدفع 100 جنيه كل شهر و40 جنيه للمياه عشان لمبة واحدة بنورها بالليل وساعات مش بنورها أصلاً مفيش غير المروحة شغالة”.

وقال سيد شعبان: “الكهرباء طبعًا فواتيرها بتيجي غالية جدًا، أقل شهر بيجي من 70 لـ80 جنيه وقطعت امبارح 4 مرات، وبالنسبة للخسائر أنا كان عندي كمبيوتر اتحرق بسبب ارتفاع وانخفاض الضغط الكهربي” .