يستقبل أهالي المنوفية، عيد الفطر بلا بهجة جراء ارتفاع الأسعار.
يقول سامي عطية، بائع ملابس: “معروف أن الاقبال يزداد في الاعياد فهو موسم للتاجر، ولكن هذا العام مختلف هناك حالة من الركود غير المسبوق في البيع والشراء”.
وقالت مها ناصر، ربة منزل: “أنا عندي 3 أطفال محتاجين هدوم للعيد وأحذية، الطفل الواحد طلباته فوق 300 جنيه، طيب أجيب من أين 900 جنيه هدوم بس؟، ده غير كحك العيد والأكل والعيدية؟ الكحك السنة دي الكيلو بـ45 أو 50 على حسب النوع، والبسكوت يبدأ من 30 والبتي فور بـ50 و60 كمان على حسب النوع، والبيوت أقل شيء تحتاجها 3 كيلو من أي نوع، يعني بجد العيشة في مصر بقيت أغلى من سعر المواطن فيها”.
وقال رضا جمال، مهندس: “أنا عندي 4 أوﻻد جبتلهم هدوم العيد بـ1800 جنيه، وكحك وبسكوت العيد بـ350 جنيه، ده غير الأكل في العيد، بجد ده خراب بيوت، المرتبات في مصر أضعف بكتير من الأسعار الخرافية ده”.
وقال أحمد سيد، صاحب محل حلويات: “الأسعار السنة دي عالية بسبب إن كل شيء غالي، السكر والدقيق والحليب والسمنة، وطبعًا ده سبب يخلي أي صاحب محل يرفع السعر علشان يحصل علي ربح، لكن لو الأسعار زي ماهي أنا مش هرفعها على المواطن، أنا عايز اشتغل مش هغلي سعر الحاجة، واخسر الزبون أبدًا”.
