يعيش أهالي بني سويف أزمات تلو الأخرى، ومن أبرزها ارتفاع الأسعار الذي ظهر في الأيام الأخيرة بشكل جنوني، وسط حالة غضب وسخط من أهالي المحافظة.
وأعربت سامية علي عن استيائها، قائلة: “الطماطم بقت حاجة فوق الوصف يوم بعشرة ويوم بسبعة ويوم بثمانية جنيه، أغلى من الفواكه، حتى البياعين غلوا كل حاجة، الملوخية بقيت بـ7 جنيه والبامية بـ14 جنيه، الأسعار بقت نار في كل حاجة”.
وأضافت علية سعيد: “كنت الأول باطلع من بيتنا وأروح السوق بـ20 جنيه، وأجيب معظم الحاجات اللي باحتاجها، دلوقتي بقيت باطلع بـ50 جنيه ومش بتكفيني.. العشرين جنيه آخرها 2 كيلو طماطم، طيب والبامية أو الخضار اللي باجيبه جنب الطماطم؟”.
وقالت سيدة متولي: “أول مرة نشوف الطماطم والبامية أغلى من التفاح والموز، يعني نروح نشتري مش عارفين نجيب إيه ولا إيه”.
ضحى جمال، هي الأخرى قالت: “كنا بنروح في آخر السوق بنلاقي الأسعار هادية شوية، دلوقتي أول السوق زي آخره، بقت الطماطم والكوسة وغيرهم نفس الأسعار مابتتغيرش”.
وقال سمير راضي، بائع “الطماطم والخضار غاليين علينا جامد، فمش قدامنا حل غير إننا نغلي على الزبون، وقلنا كده للتجار قالوا لنا غلوا، السنة دي فيه نقص شوية بسبب انخفاض الحرارة، فأخّر نضج الطماطم وخلانا نشتري من محافظة غير محافظتنا”.
وأرجع شعبان عبد العال، وكيل وزارة التموين ببني سويف، سبب غلاء الأسعار إلى انتهاء الزراعة القديمة، وأن العروة الجديدة على وشك الدخول للأسواق، لافتًا إلى أن الأسعار في الأسواق تتراوح ما بين 7 جنيهات و8.5 جنيهات، و10 جنيهات، وذلك لاختلاف أنواعها.
