تباينت آراء المواطنين وأصحاب المخابز بالفيوم بين الرضا والشكوى، عن المنظومة الجديدة؛ فمع اليوم الأول لتطبيق المنظومة، تعالت شكاوى المواطنين حول عدم استلامهم للكروت وحول خطأ في تسجيل الكروت الذكية الخاصة بهم.
وبدأ تطبيق منظومة الخبز الجديدة في محافظة الفيوم، أمس السبت، عن طريق الكروت الذكية؛ وذلك في مدينة إطسا وقرية تطون كمرحلة أولى.
وأعلن أحمد عبد الوهاب، وكيل وزارة التموين بالمحافظة، عن بدء تطبيق المنظومة؛ مشيرًا إلى أن الوزارة وزّعت المكينات الخاصة بقراءة الكروت على المخابز، وأنه سيتم استكمال المنظومة في باقي مراكز وقرى المحافظة يوم 5 من شهر مايو.
يقول أحمد محسن، من مدينة إطسا: “قُمت بتقديم الورق المطلوب لاستخراج البطاقة الذكية منذ حوالى شهر ونصف، وحتى الآن لم يتم استخراج البطاقة الخاصة بي، وعندما ذهبت إلى المديرية قالوا لي: “لسه ورقك مخلصش”، طيب أنا دلوقتي أجيب عيش منين؟ ولا أعمل إيه؟ حرام عليهم المفروض مكنوش طبّقوا المنظومة غير لما يتأكدوا إن كل المواطنين أخدوا الكروت الذكية”.
وقال أحد أصحاب المخابز: “من أول ساعة في تطبيق المنظومة الجديدة، وإحنا في مشاكل ما بين كروت مش بتقرأ على الجهاز اللي جايباه الوزارة، وما بين الناس اللي لسه ما طلعتش كروت، وعاوزة تاخد حصتها في رغيف العيش، وأنا مش هقدر أديهم غير بالكارت، والوزارة معملتش حل بديل للناس دي، وأنا ذنبي إيه؟ نقعد نتخانق مع ده وده طول اليوم بسبب موضوع الكروت؟ العملية مش منظمة خالص”.
وأضافت “سيدة حسني”: “مش كل ولادي متسجلين، وآدينا عمّالين نلفّ هنا وهنا عشان نعمل لهم الورق وورق الحكومة اليوم في شهر، إحنا موافقين على اللي تعمله الحكومة بس على الأقل يسهلوا لينا الإجراءات عن كده شوية”.
