تشهد الأسواق المصرية بمختلف محافظاتها، ارتفاعًا ملحوظًا في أسعار الخضروات والفاكهة، ومع هذا الارتفاع تبقى الأجور في مستواها دون تغير، مما أدى إلى تفاقم معاناة المصريين حتى يجد المواطن المصري البسيط نفسه عاجزًا عن تلبية متطلبات عائلته.
وفي جوله صغيرة لشبكة “رصد” بأحد أسواق مدينة ديروط، بمحافظة أسيوط، أعرب الواطنون عن استيائهم لغلاء وارتفاع أسعار الخضروات والفاكهة، حيث يقول مصطفى محمود، بائع الخضروات، بسوق السواحلية “السبب في إرتفاع أسعار الخضروات هو ارتفاع سعر الشحن”.
وأضاف: “إحنا بنبيع هنا في السوق بالأسعار اللي أقرتها الوزارة وطبعا في زيادة كبيرة وفروق كبيرة في أسعار الخضار عن قبل كده، يعنى عندك كيلو البطاطس بقى بـ5 بدلا من 4 جنيه، وكيلو الباذنجان الرومي بـ 5 بدلا من 3 جنيه، والباذنجان العروس بـ10 بدلا من 8 جنيه، وكيلو الطماطم بـ5 بدلا من 3 جنيه، وكيلو الليمون البلدي بـ10 بدلا 8 جنيه”.
وتابع مصطفى محمود، “حركة البيع والشراء بقيت ضعيفة أوي، يعنى الأول بعد ما المواطن كان بيشتري خضار كل يومين في الأسبوع دلوقت الناس بتشري يوم واحد بس، وبعد ما كانوا بياخدوا من كل صنف 2 كيلو دلوقتي لو اخدوا كيلو واحد من أي صنف يبقى كويس”.
وتذمرت الحاجة صفية محمد، ربة منزل بديروط، من أرتفاع أسعار الخضروات، قائلة: “الأسعار بتزيد وترتفع كل يوم عن اللي قبله، ده حتى الطماطم والبطاطس أكل المواطن البسيط غلوها، والكيلو منهم بقى بـ 5 جنيه، هنعيش إزاي ونأكل أولادنا منين؟ الموضوع زاد عن حده”.
وقال “حسين.س”، بائع فواكة بجوار مسجد السائح، “طالما البنزين والكهرباء والسولار غاليين هتلاقي الخضار غالي كمان، لإن كله مرتبط ببعضه، لما البنزين والسولار سعرهم ينزل هينخفض سعر الخضار كمان، إحنا مش بنرفع الأسعار من عندنا، تجار الجملة هما اللي بيحطوا التسعيرة واحنا بنشترى منهم بيها وعلى أساسها بنبيع في السوق، يا ريت الحكومة تراقب التجار الكبار مش تتشطر علينا وعلى الغلابة “.
واشتكى حازم محمد، مدرس إعدادي، قائلا: “الأسعار كل يوم بتزيد ومرتباتنا زي ما هي، وإرتفاع الأسعار مش في صالح المواطن ولا لصالح الحكومة، لازم الحكومة تبص بعين الرحمة للشعب شوية”.
وأضافت فادية حسين، ربة منزل، “احنا مش ناقصين هم فوق همنا، أنا نزلت السوق النهاردة اشتريت كيلو طماطم وكيلو بطاطس، أكلة بسيطة بـ10 جنيه”.
