اشتكى أهالي المنوفية من منظومة الخبز الجديدة، التي تبدأ توزيع الخبز من الواحدة بعد منتصف الليل، وحتى الساعه 11 صباحًا.
وأعرب المواطنون عن استيائهم من منظومة الخبز في مراكز"بركة السبع، ومنوف، وقويسنا"، والتي ينتهي بها الخبز قبل الموعد المحدد للانتهاء، وعدم حصول المواطنين على حصصهم من الخبز.
وقال حسن السيد، صاحب فرن بمنوف: "أنا بيجيلي حصة معينة، بخلصها واقفل ده مش ذنبي، وطبعا الناس مش بيعجبها الكلام ده، وبيحصل خناقات ومشاكل أمام الفرن، وقلت لهم أكتر من مرة اشتكوا في وزارة التموين، وأنا أعملهم إيه؟".
وبدوره، أضاف يوسف سامي، أحد أهالي سرس الليان: "أنا بفضل واقف من الساعة 2 بالليل، عشان أجيب 20 رغيف، ومطلوب مني الفجر أروح أفطر، وأطلع أركب القطر علشان أروح شغلي، أو الحل التاني ان مراتي هي اللي تطلع قبل الفجر تقف في الطابور علشان ناكل عيش !! ليه إهانة الشعب بالشكل ده؟!".
ومن جانبها تابعت الحاجة عفاف حسن، من أشمون: "بصحى من النوم في نص الليل، علشان أروح اجيب عيش ولو اتاخرت مش بلحق أطلع العيال للمدرسة وللجامعة"، وتابعت: "لقمة العيش بقيت صعبة قوي إحنا بنتقدم ولا بنتأخر!!".
وأضافت: "لما بسأل الفرن العيش بيخلص ليه، المفروض ان كلنا ناخد قالي الكميات اللي بتيجي لنا كده، روحي اشتكي في التموين طيب مش المفروض ان معمول حساب كل اللي له بطاقه؟ قالي معرفش روحي اسالي! الواحد مش بقى فاهم مصر ماشية ازاي!!".
أما مريم أحمد، من بركة السبع، فأوضحت: "في أول يوم المنظومة الفرن فضل شغال لحد العصر الناس كلها خدت العيش بتاعها، وبعدها يوم عن يوم الموضوع قل جدا، وأصبح العيش بيخلص قبل ما كل الناس تاخد، ضيف على كده المحسوبية تكون واقف من الساعة 2 ويجي واحد الفجر ياخد العيش ويمشي، تجي تتكلم يقولك الوزير قال هاتوا من أي طابونة مش لازم من عندي! محدش بقى بيخاف من ربنا".
وتابع إبراهيم صالح من قويسنا: "المفروض أننا كنا مشتركين في منظومة عيش قبل ما المنظومة الجديدة تتطبق، يعني كلنا لنا حصة عيش، كل اللي فرق اننا بقينا بنقف طوابير زي زمان!!، المفروض بقى ان حصص العيش ثابتة إزاي مش بتكفي الناس ؟؟!! سؤال لاحد من المسؤليين أو أصحاب الأفران بيرد عليه".
