دافعت الناشطة نوارة نجم ن عبد الله عاصم وموقفه بعدم الرجوع لمصر مؤكدة انه لو رجع فسيفشل وسيتم مطاردته ولكن في امريكا هم يعرفون قيمة العباقرة والمخترعين.
وقالت نجم عبر حسابها الرسمي على فيس بوك: "أوعى ترجع يا حبيبي… ربنا يوفقك ويبارك لك في ذكائك وعبقريتك وعلمك وينجيك انت رحت عند اللي حيعرفوا قيمتك وان شاء الله يساعدوك ويعلموك ويوفروا لك كل احتياجاتك عشان تصقل عبقريتك بالعلم" .
وأضافت: "ابعت هات أهلك يعيشوا معاك بدل ما يقرفوهم هنا، وابعد يا عبد الله.. ابعد خالص وانسانا، ولا تبص علينا على الخريطة… ولا تعتب البلد دي قبل ما تاخد جايزة نوبل… وحتاخدها إن شاء الله، ولما تاخدها العاهات الذهنية اللي بيشتموك دلوقت حيقولوا العالم المصري الكبير ويتصوروا جنبك زي ما بيتصوروا جنب الدبابة".
وأوضحت وجهة نظرها قائلة:"احنا مش وش عباقرة ولا وش اختراعات احنا كفاية علينا العاهات الذهنية اللي بتطلع في الإعلام تشتمك وانا مش انسانة شريرة عشان ادعي عليهم يشرفوا هم كمان في امن الدولة ونشوفهم حيقعدوا في البلد ولا لا؟ الانسانية محتاجة علمك ومش ذنبك ولا ذنب البشرية انك اتولدت في بلد حراس الوطن اللي فيها بيعذبوا العباقرة عشان يكافحوا الارهاب قول الحمد لله انك نفدت".
وقالت: "انت عالم عبقري، كفاحك ونضالك في الدنيا انك تفيد البشرية بعلمك مش انك تقعد هنا تخيب جنب بتوع الاكس فاكتورز.. تقعد تعمل ايه؟ تناضل عشان يتقال عليك نوشتاء السبوبة ولا يجيلك تخلف من البيروقراطية ولا تتهبل وتتكلم عن المؤامرة؟ مع السلامة يا عبد الله ما تبصش وراك ولا تفكر في منزل العائلة المسمومة ده تاني… ربنا فك اسرك اوعى ترجع لبيت الاشباح بعد ما ربنا عفا عنك".
