روت هاجر العراقي -إحدى الناجيات من الاعتقال والسحل أمس- شهادتها على جريمة الإنقلاب أثناء إعتقال 22 فتاه بالاسكندرية أمس والقيام بسحلهم وضربهم وخلع الحجاب عنهم قبل ترحيلهم في سيارات الأمن لمكان احتجازهن.
وبحسب شهادتها التي نشرها الحقوقي هيثم خليل:"بدأنا الفاعليه التانيه من عند الديب مول ف رشدي ومشينا شارع سوريا متجهين للبحر وقبل نهايه شارع سوريا حدفوا علينا زجاج وفي بنتين اتصابوا ساعتها شفت علا صاحبتي كانت واقعه علي الارض واتصابت من الزجاج ف رجلها سلعتها اتفرقت عن صحابي ورحت شيلتها انا وبنت تانيه و وقعدنا بيها علي جنب و الباقي كمل قدامنا ووصلوا لحد اعلي كوبري ستانلي واحنا حصلناهم وكنا ف اخر الناس وسبت علا وواحده صحبتها عشان كانوا هيركبوا تاكسي خلاص و ويروحوا ".
وأضافت حول كيفية اعتقالهم قائلة:"وقبل ما نتحرك من علي كوبري ستانلي فوجئنا ب سياره اسعاف كانت معديه بسرعه وقفت كانوا حاطين فيها جرايه و كان في عربيات عاديه فيها المخبرين والداخليه وجه بوكس وقف ونزل منه ظباط و اطلقوا رصاص حي ف الهوا وبدأوا يجروا ورانا بدأنا كلنا نجري وبدأنا ندخل الشوارع الجانبيه واحنا بنجري فوجئنا ب 15 تشكيل جيش وداخليه جم كان في طيارات هليكوبتر بدأت تيجي فرضوا زي حظر علي المنطقه عشان يمشطوها و يعرفوا يدوروا علينا".
وحول سحل وضرب البنات قالت:"وبدأوا كلهم يجروا وانا ف احد الشوارع الجانبيه وكل شويه اسمع صراخ بنات بتتمسك وكانوا بيسيبوا الولاد وياخدوا البنات وكنت ف اوائل الناس لقيتهم طلوعولي من احد الشوارع الجانبيه و مسكوني من شنطتي وجروني علي الارض وفضلوا يضربوا فيا بضهر البنادق علي ضهري وعلي دماغي و ضربوني علي وشي و ف رجلي لحد ما وقعت منهم ومش بقيت قادره اتحرك من الضرب وشبه فاقده الوعي وكانوا قاعدين يشتموا فيا وقلبوا شنطتي و ال فيها علي الارض واخدوا فلوسي منها وبعدها فضلوا يجروا فيا عشان ياخدوني للبوكس ".
وأوضحت كيف هربت من جحيم الاعتقال فقالت:"وهما بيجروني طلع واحد سواق تاكسي قالهم سيبوهالي انا هتعامل معاها بنت دي قاله خدها دي شكلها مش تبعهم وضاحكين عليها وادوها فلوس وفعلا شدني السواق واخدني ووصل بيا لحد باب القسم وقالي انا ممكن ادخلك القسم ومش تطلعي منه بس انا مش بعمل ف ينات الناس كده وسابني امشي ."
