كلام د.علاء الأسواني ، أنا بعتبره إهانة ليا ، وإهانة شخصية كمان
كانت جدتي – الله يرحمها ، أمية ، مابتقراش ولاتكتب بس بتعرف تحسب كويس ، وكانت من فضل ربنا عليها حريصة انها كل يوم انها تسمع الأسئلة اللي في اذاعة القرآن الكريم والفتاوي بتاعت الشيخ عطية صقر ، وكانت بتسألني كتير أسئلة زي : طيب لما ربنا بيحب المسلمين ليه بيموت أطفالهم في فلسطين ؟ وبعدين تقوللي كده : أنا مش بعترض بس عايزة أفهم ، ولما قلتلها حكمة الابتلاء ووجوب السعي للتغيير بالأسباب الشرعية فهمتها كويس واستنتجت لوحدها قاعدة الأمور القدرية الكونية ، والقدرية الشرعية.
كانت – ربنا يرحمها – بتتدخل في مشاكل الجيران تحلها ، وعمر ماجه جار جديد جنبنا إلا اما زارتو وساعدته واديتوا المشورة والنصيحة.
كانت مصرة علي اني انا وأخويا نتعلم ، ورغم انها مكانتشي بتقرا ولاتكتب الا انها كانت مهتمة جدا بالعلم والتعليم وبتعتبروا هو المعيار الحقيقي لتقدم أي أسرة.
الوالد مادخلشي مدارس ، لكن خطه أحسن مني ، حاجة فنية جدا ، وكان مؤيد للدكتور العوا في الانتخابات وأقنعته بصعوبة جدا بانتخاب الدكتور أبوالفتوح.
الوالدة لقبها عندي أنا (وزير المالية) وطول عمر كل مشاريعنا الناجحة بيكون سببها حسن توفير وتدبير الوالدة اللي مابتعرفشي تقرا ولاتكتب ، وأقدر أقوللك بكل بساطة ان كل خبراتي الاجتماعية في التعامل مع الناس ، الصح والغلط ، الحلال والحرام البسيط ، العيب والتقاليد واللي ينفع واللي ماينفعشي ، كل ده خدته من جدتي وأمي ، لأن بطبيعة الحال الوالد كان مشغول جدا
النموذج المعرفي الغير مرتبط بأكاديمية المعرفة الحديثة المدونة أثر في حياتي كلها لدرجة اني لما قدمت للحزب عندنا فكرة تكوين البرلمان بغرفتين الأولي علي غرار مجلس الشعب والتانية مكونة من خبراء وتخصصات عليا كتطبيق لفكرة أهل الحل والعقد ، كان من ضمن الناس اللي مطلوبين في غرفة البرلمان التخصصية (مجلس الشوري) ، أعيان البلاد والعمد ومشايخ القبائل باعتبار ان خبرتهم الحياتية هي جزء مهم ومفيد جدا بل وضروري لصانع القرار الموضوعي الذي يهتم حقا بصنع قرار سليم
اهدار النموذج المعرفي ده واقصاؤه لمجرد اننا (نضيق علي الاخوان مجال استغلالهم) هو عطب في التفكير وانحراف انساني يجعلنا نتوقف لنفكر بعمق عن فهم البعض لـ (الديمقراطية هي الحل)
أعتقد أن ديمقراطية البعض معطوبة للغاية
د.دسوقي أحمد (طبيب مصري مقيم بألمانيا)
