التغيير يعني إيه ؟؟
من صغرنا واحنا بنتفرج على أفلام هجرة الرسول وفجر الإسلام …الخ وبنشوف حاجة رسخت في ذهننا كلنا .. الراجل الكافر اللى وشه عليه غضب ربنا وهدومه سودا وعمال يشخط وينطر ومزاجه زي الزفت ومش في المواد خالص بسبب الدين الجديد بخلاف طبعا الرقاصات والخمر والقعدة الحلوة … وهوب على سهوة وبمجرد ما يسلم … يبدأ المخرج النشيط كالمعتاد بعمل رتوش التغيير المعروفة .. تغير زاوية الاضاءة عشان وشة ينور .. الميك اب يتظبط وتبقي ملامحة هادية ووديعة .. والهدوم اهم حاجة الهدوم لازم بقدرة قادر تتقلب ابيض .. وكأن اليونيفورم بتاع المسلمين لازم يكون ابيض ولو واحد مسلم لبس الوان يبقي لسة على ملة الكفر .. وبنشوف بقي التغير الفوري اللى بيحصل له وانه بقي شخصية لوز اللوز والتقوي والورع والايمان ماليين قلبة „, نطلع بالزمن شوية لأفلام اكتوبر العظيمة زي فيلم بدور واللى فيه الحرامي بيتقلب وطني والوحش بيبقي حلو .. وكل الشخصيات بنت ال ( …….. ) العبور بيغيرها في يوم وليلة، فكرة التغيير نفسها مرتبطة في دماغنا بتغير الحالة او الموقف تغيير سريع … ولع اللمبة .. اطفي اللمبة .. ابيض .. اسود اما فكرة ان التغيير ياخد وقت او يكون على مراحل فده شيء مش بنهتم بيه اوي بل ومش بنقتنع بيه بسهولة ( مش زمان الكافر بيبقي مسلم والدنيا بتقلب ربيع والجو بديع مرة واحدة ؟ ) التحول من حالة الي حالة يتطلب بعض الوقت نظرا للظروف … التلج بياخد وقت عشان يسيح والمية بتاخد وقت عشان تتبخر ,… والرئيس بياخد وقت عشان شغله يظهر ….. بتداااااااااافع عن مرسسسسسسسسسي ؟؟؟؟؟؟ سامعها من صوت البعض باستنكار … لكن اصححها واقول بدافع عن عقل ومنطق خاصة ان الدفاع عن الرئيس في الوقت الحالي تهمة بشعة لا تقل بشاعة عن اكل لحوم البشر او معاداة السامية .. الكثير منا ( والكثير جدا الحقيقة ) تخيلوا في ليلة ١١ فبراير ان بسقوط مبارك انتهي عصر الفساد والظلام والرشوة والمحسوبية و كل ذلك وانا منهم الحقيقة وعزائنا الوحيد انه وفي تلك الليلة وما سبقها عرفنا لفظة ( ايد واحدة ) والشعب كله متجمع في الميدان متعرفش فيها المسلم من المسيحي من الليبرالي المنقط من السلفي الكاروهات .. الكل اسمهم مصريين وبس كلنا تخيلنا ان تانى يوم الاضاءة هتزيد في وشنا وزاوية الكاميرا هتختلف .. وكلنا هنلبس ابيض .. ( اشمعنا احنا ) ناسين او متناسين ان بخروج مبارك اصبحت الذبيحة بدون حارس والاكلة ستتداعي على قصعة مصر للفوز بنصيب الاسد في الذبيحة والاقوي من النخب السياسية الكرتونية في العصر البائد هي اللى هتقدر تفوز … ووقتها وقتها بس اكتشفنا ان لون الثورة اللى كان صابغ الكل بلونه .. نزلت امطار الفتنة عشان تظهر الوان كل واحد وحزمة الحطب الواحدة بقت ١٠٠٠٠ حزمة كل دة ونسينا ببساطة ان التغيير مش تغير نظام .. وان مبارك مش هو اللى جاب المبيدات المسرطة بأيدة وغرق العبارة برجلة .. وحرق قطر الصعيد بصوابعه ومش هو لوحدة اللى أكل الجبنة … ٣٠ سنة يا سادة علمت الكثير والكثير الفساد واخرجت لهم اسوء من في النفس البشرية من الطمع والجشع والمحسوبية والانحراف والسرقة .. والصغير يسرق لان الكبير يسرق وهلما جرا .. ففي منظومة متكاملة من الفساد لا يكفي ابدا بقطع الرأس ولكن بعلاج الجسم بأكمله وتطهيرة منها … وان كان سجن طرة يحتفل بوجود شلة الفاسدين هناك فخارج طرة ألوف مولفة من الفاسدين ممن يسوءهم تعطل مصالحهم وفسادهم الذي يغنيهم ولذا كان هناك محمد محمود ومجلس الوزراء وماسبيرو واستاد بورسعيد ومسرح البالون وعشرات الكوارث والمصائب والتى اكدت بما لا يدع مجال للشك ان التغيير قد يبدو انه بدأ في ليلة ١١ فبراير .. ولكن لم ولن ينتهي لليوم كل الناس منتظرة التغيير … الكل بيطالب بزيادة المرتبات .. الكل بيطالب بحياة افضل الكل عايز يبقي متوظف في وظيفة ممتازة وكأن البلد حالها هيتعدل في يوم وليلة وكان مفيش معوقات ولا ديون ولا مشاكل ولا حاجة ؟؟ هل نقدر نصنف دي كمان على انها من مساويء النظام السابق اللى خلق فينا الطمع وعدم الصبر والانانية ؟ الكل عايز التغيير السريع طب منين يوم ان نجح مرسي لم اجد في يده عصا سحرية او تعويذة كونية لتغيير الحال ٣٦٠ درجة … ولا يمكن ان يحول مصر الي اليابان في شهور متعددة خصوصا وان الشعب المتسرع اللى عايز كل حاجة تتم بسرعة مش بيعطي الجهد الكافي اللازم ان العجلة تدور مش نتطور كمان … الاف الاعتصامات والاضرابات وقطع الطرق .. والمضحك المبكي ان الاضراب يتم من اجل زيادة المرتبات او اعطاء مزايا ( طب منيييين ) بالرغم من ذلك اعتبره اخطأ حينما اعطى لنفسة مهلة ١٠٠ يوم لتنفيذ بنود من برنامجه غير متخيل – وهو دكتور جامعي متعلم – ان الفساد والمعوقات و المشاكل والمطبات في طريقة ستمنعة من تنفيذ اغلب ما وعد به ..! الامر الذي اعطى لخصومه فرصة ذهبية للهجوم عليه بسبب عدم وفاءة بما وعد به .. وهم في موقف قوة بالرغم من تبريرات الاخوان المعتادة وتمسكهم بمبدأ انا ابرر اذا انا اخواني .. يا سادة نهضة مصر ( ولا اقول برنامج النهضة ) ستحتاج لسنوات من العمل الجاد وليس لشهور او لأيام .,… واؤكد سنوات من العمل الجاد وليس من الاضرابات و القلاقل و الاعتصامات والتغيير سيحدث لا محالة .. ولكن يحتاج الوقت والصبر .. عمليتنا الجراحية لن يلتئم جرحها في ايام … فساعدوا الطبيب ليتعافي الجسد سريعا ولا تحاربوه فهو يقوم بأفضل ما يمكن عمله بلا مزايدات
