استنكر الناقد الفني طارق الشناوي، اليوم الأربعاء، اتجاه الفنان رامز جلال لتقديم برامج المقالب قائلا” جنى على نفسه في السينما.. فيلمه الآخير (كنغر حبنا) لم يحقق أي إرادات بسبب إن (رامز) مش قادر يتخلص من شخصية بتاع المقالب في رمضان “.
وأضاف الشناوي، في برنامجه “حكايات فنية”، الذي يقدمه عبر فضائية “سي بي سي إكسترا”، “مقدرش أنكر كثافة مشاهدة عالية بيحققها رامز جلال في برامجه، بدليل المبالغ الضخمة التي يحصل عليها، ليس فقط هو، بل أيضًا لمن يشاركوه في البرنامج من الضيوف.
وأوضح حقيقة برامج المقالب التي يقدمها رامز، قائلًا: “طبعًا اللي بيعمله رامز مش مقلب، ما يحدث يتم باتفاق مسبق، هو مش مقلب على الفنانين أو الضيوف اللي بيشاركوا، لا هو مقلب علينا، عشان إحنا بنصدق”.
وكشف السر في تصديق الجمهور لهذه المقالب ومشاهدته لها؛ بقوله: “الناس نفسها تتفرج على الفنان في لحظة على طبيعته، فيقولك إلحق فلانة شتمت، الفنانة اللي بنشوفها وقورة في التليفزيون تلاقيها شتمت، يقوم الجمهور يتبسط بسبب الشتائم بالأب والأم والبصق والضرب اللي بيحصل”.
تابع: “الجزء الأساسي في برامج المقالب إن إحنا كجمهور متواطئين، أنا نفسي متواطأ زيّكم، لأني بتفرج برضو، وأنا بقول الكلام ده لأننا يمكن أما نعرف إن الفنان بيخدعنا نغير رأينا شوية، مع إني أشك، برضو هنفضل نتفرج على البرامج دي”.
وفي سياق متصل، علق الشناوي على برامج المقالب التي اتجه إلى تقديمها الفنان هاني رمزي، بداية من رمضان الماضي، فبين أن “هاني على قده، رامز مثلًا بيلعب بالملايين، وعشان كده بيجيب النجوم اللي بياخدوا ملايين، وهنشوف ده في برنامجه الجاي (رامز بيلعب بالنار)، في تكلفة إنتاجية عالية فعلًا، لكن هاني مش بيستضيف غير نجوم صف تاني، وبرنامجه (هاني في الأدغال)، اللي هيقدمه رمضان الجاي تقلص إنتاجه أكثر”.
وأضاف: “هاني رمزي أفلامه مؤخرًا لم تكن على المستوى، وكنا متعودين إنه بيظهر كل رمضان بمسلسل وبإعلان، لكن ده انتهى مؤخرًا، لذلك هو الآن يتشبث بآخر شيء متاح له، وهو برامج المقالب، لكنه مش واخد باله كمان إنه بيلعب في دوري الدرجة التانية في الضيوف وفي الجمهور، مش دوري الدرجة الأولى زي رامز جلال”.
