نفى الناشط سامح سمير الأخبار التي تم تداولها عن اعتقال الناشط الحقوقي والمحامي مالك عدلي، وهو في حالة سكر، وكانت قوات الأمن قد ألقت القبض على مالك عدلي لتنفيذ قرار الضبط والإحضار الصادر ضده بتهمة التحريض على التظاهر، وتم عرضه على النيابة العامة، وتم حبسه 15 يوما على ذمة التحقيق.
كتب سامح سمير عبر صفحته علي الفيس بوك:
أكتر من صحفي كلمني يسألني عن ادعاء الأمن الوطني أن مالك عدلي اتقبض عليه وهو في حالة سكر بين، فأنا عايز أوضح الحكاية دي:
1- أنا مش مندهش من انحطاط الأمن الوطنياإللي مش مكتفي بأنه بيحبس محامي عشان لجأ للمحكمة في أمر عام لأ.. وكمان بيشوه سمعت، بس والله حاجة لطيفة إن قضية يبقى فيها حظر نشر كلها ما عدى ادعاء أن المتهم سكران وصورة القضية اللي النيابة مش عايزة تديهالنا يتاخد منها تقرير الطب الشرعي ويتبعت للصحفيين.. تطور مهم والله في مدى الانحطاط وهتك عرض القانون.
2- بعد القبض على مالك بكام ساعة إتحقق معاه لمدة 4 ساعات كاملة كان كل سؤال فيهم بيجاوب عليه بعريضة قانونية في 3 صفحة متضمنه ردود سياسية وقانونية مدعمة بنصوص الدستور والقانون وقرارات الحكومة والمراجع التاريخية للجزر.. قولي بقي إن ده إتزان واحد سكران.
3 – وكيل النيابة -رغم المخالفات اللي في التحقيق- كان منبهر بردود مالك وإتزانه لدرجة إن اللهجة إتغيرت من (الأخ مالك إللي جايلنا سكران) أول ما جاله الورق لبعد أقل من نص ساعة بقي الخطاب ( الأستاذ مالك المفوه بالقانون والتاريخ ) طلبنا منه يثبت ملحوظة بإنه ناظر مالك ولقاه في كامل وعيه لكنه تجاهل ده.
4- مالك وزيزو عبدو أخدوا علقة موت ساعة القبض عليهم من 8 – 10 بغال أمن دولة واترفع عليهم السلاح وإتغموا وإتقيدوا من الخلف وإتحطوا في عربيات مفيمه من غير نمر وفي قسم المعادي قلعوا مالك التي شيرت إللي كان لابسه لإهانته وصوروا بالشكل ده .. مالك كان واخد ضربة قوية علي ضهره مخلياه يتحرك بصعوبة فعلاً.
5- مالك راح المستشفي عشان يعملوا تقرير طبي إنه مضروب ، لكنهم عشان يهربوا من أي أصابات فيه قالوا إنه سكران ، والتقرير الفضيحة إللي جه ده كان فيه شطب 3 مرات ، تقريباً إللي بيملي كان متردد وهو بيكتبه ، غير أنه أساساً كان لازم يكون بأمر النيابة ويتاخد عينة دم أو بول للتحليل مش بس إنه مش قادر يقف – من الضرب – يبقي سكران.
6- سذاجة التلفيق والتشويه ..اتهام مالك بإتحاده مع جماعة الأخوان المسلمين ، وطبعاً إحنا عارفين إن إجتماعات الإخوان كلها رز بلبن و ويسكي بالتلج.
والحقيقة بقي إن درجة الإنحطاط بقت تقرف .. حتي القتله والمزورين والحرامية وإللي بايعين بلادهم مش بالعفانة بتاعتكم دي ولا بالسذاجة دي ، بالذات إنك وإنت بتتهم أحد أبرز محامين مصر بمحاولة إسقاط الدستور وهدم الدولة وإتهامات تحبسه باقي عمره ، فكل إللي إهتميت بيه وبعته للصحافة إتهام إنه سكران “
كانت النيابة قد وجهت لـ”عادلي” تهم محاولة قلب وتغيير دستور الدولة ونظامها الجمهورى وشكل الحكومة، والانضمام إلى إحدى الجمعيات والهيئات والمنظمات التى تبغى إلى تعطيل أحكام الدستور والقوانين، ومنع مؤسسات الدولة وسلطاتها العامة من ممارسة عملها، والإضرار بالوحدة الوطنية والسلام الاجتماعى، والترويج بالقول والكتابة للأغراض محل الاتهام الأول، وذلك بأحد الطرق المعدة للتوزيع والطباعة، وإذاعة أخبار وبيانات وإشاعات كاذبة من شأنها تكدير الأمن العام.
بعد القاء القبض عليه ، كان هشتاج “مالك عدلى” الاكثر تداولا على “تويتر” .
