كشف المحامي خالد على، المرشح الرئاسي السابق، كواليس مشاركته في مظاهرات “25 إبريل” الرافضة لتنازل السيسي عن جزيرتي “تيران وصنافير”، ومكالمة حمدين صباحي، لمساندة المحتجزين داخل حزب الكرامة من قبل قوات الأمن.

كتب “علي” في صفحته على “فيس بوك”، اليوم الثلاثاء: “بالرغم إن الواحد بيشعر بالحرج إنه يتكلم فى الموضوع دا وفيه مئات الشباب والشابات مقبوض عليهم ولسه مش قادرين نحصر العدد الحقيقي كام، خاصة إن فيه ناس محتجزة في معسكرات الأمن، والأقسام حتى الآن مش بتقول معلومات كاملة عن المحتجزين لديها، والنيابات غالبا هتتنقل تحقق مع الشباب في الأقسام والمعسكرات”.

وأضاف: “لكن من إمبارح بتتشير بوستات إنى منزلتش المظاهرات، واللي خلاني أكتب البوست دا مش عشان أقول نزلت ولا منزلتش، لكن اللى خلاني أكتبه هي محاولات البعض لإشاعة حالة من الإحباط لليوم، وإفقاد الناس والشباب الثقة في كل شيء حولها، سواء من مجموعات سياسية أو أشخاص”.

كواليس مشاركته

وعن كواليس مشاركته، فقال: كان المتفق إني أروح لتجمع هيتكون أمام نقابة المهندسين، وبعدها نتحرك في تظاهرة لنقابة الصحفيين، ونتيجة إغلاق عدد من الطرق بفعل كمائن الأمن والبلطجية نزلت من التاكسي أنا وزياد العليمى عند تقاطع طلعت حرب مع ٢٦ يوليو، واتحركنا في شارع عرابي للوصول لنقابة المهندسين، وطبعا كلكم شايفين شكل اليوم والمخبرين المترشقين في كل حته، وطلبت من زياد يمشى خلفي عشان لو عايزين يقبضوا عليّ يقدر هو يتحرك ويروح للتظاهرة والعكس صحيح؛ لأن اتفاقنا إنه مهما حصل لازم نضم على التظاهرة.

وتابع: “وأنا ماشى في الشارع شاهدت علاء كمال قاعد على قهوة ليالينا، وشاهدت على نفس المقهى مجموعة أخرى أعرفها من المنصورة ولما ابتسموا لي ومندهوش عليا تجاهلت السلام عليهم عشان تأمينهم؛ لأن المخبرين كانوا مترشقين في الشارع وبالقرب من القهوة، وكملت في طريقي لنقابة المهندسين، وقبل ما أصل لمحل التابعي الدمياطي تقابلت على رصيف الشارع مع محمد العجمي قيادي كفاية بالقليوبية، وكان بالقرب منه مجموعة من شباب بنها واضح إنهم كانوا ماشيين فرادى وعلى جانبي الطريق عشان تأمينهم، ومحمد قالي كل المداخل لنقابة الصحفيين متقفلة وبيقبضوا عشوائي على الشباب في الشارع، والشباب بيحاولوا يتجمعوا في حتة تانية، ولما قربت من نقابة المهندسين وصلني اتصال بإن تجمع النقابة اتلغى والناس طلعت على الدقي، بس الأمن وصل وبيفضها، وبعدها وصلنا اتصال من علاء كمال إن الأمن وصل القهوة، وطلب من الناس كلها تمشي منها”.

وواصل: “وبدأت الاتصال بمجموعات أخرى عشان نشوف أتحرك ليهم على فين بعد ما تظاهرات ناهيا والدقى اتفرقوا، فانتظرت رفقة إحدى المجموعات وتم التواصل مع مجموعات أخرى وعلمنا بتحرك تظاهرة بشارع السودان واتفقت معهم على الانضمام ليهم لكن بعد ثلاث دقائق انتشرت على النت أخبار فضها فاتصلت بالمجموعة وتأكدت من صدق خبر الفض، ودا غير محاولات أخرى”.

مكالمة حمدين صباحي

 وتطرق خالد علي إلى مكالمته مع حمدين صباحي فأضاف “ومع كل دا بدأت تطلع أخبار حصار حزب الكرامة وبدأت الأخبار تتواتر ما بين إن الحصار تم فضه تارة وبين إن الحصار مستمر بس من مداخل الشوارع، وبدأت أتصل بالشباب اللي موجودين بالكرامة، واتأكدنا إن الحصار لم يتم فضه وإن الشرطة واقفة في الشارع ومشترطة إنهم يسلموهم عدد من الشباب، فبلغتهم إنى هضم عليهم في الكرامة، وتواصلت مع طارق نجيدة محامي التيار الشعبي، وزياد العليمي بعدها عرف يوصل لحمدين، واداني التليفون وكلمت حمدين وقلت ليه أنا وزياد في الطريق لحزب الكرامة قالى أنا في المكان الفلاني عدى عليا هتحرك معاكوا على هناك، وكلمت أكرم إسماعيل كان واقف في الشارع بجوار الكرامة، وكذا بحر وطارق نجيدة داخل الكرامة بلغتهم إنى هعدى على حمدين أجيبه ونضم على الشباب في الكرامة”.

وأوضح: “بالفعل وصلنا أنا وزياد لمكان حمدين لكن قبل ما ننزل من العربية طارق نجيدة كلمنى وقال وصلنا لاتفاق والأمن مشى وبلاش تيجوا على الحزب واحنا بدأنا ننزل الشباب، وبعدها وصلنى اتصال من حمدين بنفس المضمون، فاتحركت أنا وزياد من غير ما نشوف حمدين عشان كان فيه حاجات تانية لازم نعملها، ومن ضمنها أتابع مع زمايلى المحامين إجراءات المحاضر والتحقيق”.

واختتم منشوره: “مرة تانية أنا شاعر بالخجل إنى أكتب الكلام دا في الوقت دا، وبأكد أنا كتبت البوست مش عشان أقول نزلت أو ما نزلتش لكن عشان أوضح الصورة وأحكي جزء من اللي حصل في هذا اليوم”.

وكانت معظم المحافظات شهدت أمس تظاهرات لحركات شبابية وثورية؛ احتجاجا على تنازل عبدالفتاح السيسي عن جزيرتي تيران وصنافير للمملكة العربية السعودية، وواجهت قوات الأمن المتظاهرين باستخدام قنابل الغاز والخرطوش لتفريق التجمعات بالقاهرة وعدد من المحافظات.