أكد البرلماني السابق زياد العليمي أن أصحاب الطبقة الوسطى، داعمين للنظام المصري على اعتبار أنه ينقذهم من مصير مجهول، وأنه يقدم له العديد من الخدمات.
ورصد “العليمي” في منشور له على حسابه بموقع “فيس بوك” عددا من الخدمات التي يقدمها النظام للطبقة الوسطى، وهي:
1- أولاده بيتعلموا في مدارس خاصة مش حكومية.
2- بيتعالج في مستشفيات خاصة مش حكومية.
3- بيركب عربيته مش المواصلات العامة.
4- بيشتغل في القطاع الخاص مش الحكومة.
5- بيسكن إيجار جديد أو في مشروعات خاصة لأنه مش عنده واسطة تخليه يكسب في القرعة.
6- لو اتسرق وعمل بلاغ بيتقال له يتفاوض مع الحرامية، وعلاقته بالشرطة إنه يتعذب أو يتقتل أو يختفي قسريًا.
7- وبالنسبة للحماية من الأعداء، النظام طول الوقت بيأكد إن الكيان الصهيوني “دولة صديقة”، وبيصوت لها في المحافل الدولية، والقرارات المتعلقة بإدارة شؤون البلاد بيعلنها الديوان الملكي السعودي قبل ما تعلنها الحكومة هنا.
8- بيشرب مياه معدنية ومش بيستخدم مياه الشبكات العمومية.
وتساءل “العليمي” ساخرا: “إيه اللي هيحصل لو المواطن ده وفر فلوس الضرايب، وجاب بيها حرس خاص يحموه من بلطجة أجهزة النظام، قبل ما يحموه من الحرامية!! ع الأقل كفاءتهم أعلى”.
وأضاف: “دا قطاع من المجتمع المصري -حتى لو مش أغلبية- بيقدم واجب الطاعة للنظام بدون حقوق في المقابل، النظام مش أبونا ولا أهلنا، النظام هو مجموعة من الناس المفروض يشتغلوا لصالحنا، مقابل دعمنا ليهم ماليًا بالضرائب والرسوم والطاعة فيما يتعلق بالأمور العامة، وعلشان كدة كل واحد فينا لازم يسأل نفسه: النظام بيقدملي إيه كمواطن مقابل الطاعة!!!!“
