أثار تصريح العميد ثروت سويلم المدير التنفيذي باتحاد الكرة وعضو برلمان 2015 عن حزب المصريين الأحرار استهجان وغضب أهالي دائرته مركز أبوحماد بالشرقية.
وكان سويلم قد صرح أثناء استخراجه كارنيه عضوية البرلمان قائلا: “ضباط الشرطة ماخدوش حاجة ويجب زيادة مرتباتهم، وهطالب بوضع ضوابط جديدة لتعامل الشرطة مع المواطنين”.
وعبر أحمد رجب، طبيب بشري عن غضبه قائلا: “سويلم عاوز يزود ضباط الشرطة مش كفاية مرتباتهم الفلكية واللي أكتر من راتبي بعشرة أضعاف”.
وأضاف محمود زكي، سائق توك توك: “الحكاية كلها إن ثروت سويلم عاوز يرد الجميل للضباط أصحابه اللي زوروا الانتخابات لصالحه وبعدين هو ضابط شرطة يعني عاوز يقلب عيشه ويزود مرتبه اللي أكتر من مليون جنيه”.
وقال خالد السيد: “إحنا انتخبنا ثروت سويلم علشان يخدمنا احنا الغلابة ويشوف مصالحنا ويزود مرتباتنا اللي مش بتكمل لنصف الشهر مش يزود ناس بتاخد آلاف الجنيهات غير الرشاوى”.
ووجه محمد أيمن حديثه لسويلم قائلا: “يا سيادة النائب البلد مليانة مشاكل القمامة في كل مكان، والصرف الصحي غرق شوارع أبوحماد والمؤسسات الحكومية وحتى منزلك وغير أن الرشوى منتشرة وانعدام الأمن وانتشار السرقة وتلوث المياه، وبعد كل ده مش شايف أي مشاكل غير أن الضباط الغلابة عاوزين يزودوا مرتباتهم!! طيب زود مرتبات الدكاترة والمعلمين والموظفين اللي مرتبهم بيخلص قبل نصف الشهر”.
