وجَّه المخرج عمرو سلامة، رسالة ساخرة لعبدالفتاح السيسي، طالبه من خلالها بالإفراج عن المعتقلين.
كتب “سلامة” -في رسالته التي نشرها عبر صفحته الرسمية على موقع “فيس بوك”-: “سيادة الرئيس أتمنى أن يصلك كلامي التافه لك.. مقدرين مشاغلك، وعدم حبك للانتقاد، وأنك في مكان أتيت له تنازلًا وخدمة لنا وأننا مثقلين عليك، ونشكرك أنك بتحنو علينا وبتمدلنا إيديك”.
وأضاف “اعذرنا، يمكن مش بنقول آمين كفاية، وفي شوارع مش ملزوق فيها لسة صورك، وغصب عن الإعلاميين في منهم مش بيعظمك يوماتي، والشباب من طيشهم مش مقدرين احتضانك ليهم و”السيلفيز” اللي خدتها معاهم.. بس لو فيها سخافة وقلة ذوق، في كام واحد مسجونين كده لو طلعتهم يبقى كثر خيرك، وتبقى فعلًا نعم الأب والأخ”.
وتابع: “منهم إسراء الطويل وعلاء عبدالفتاح وغيرهم، شباب اتهوروا وحبوا بلدهم بطريقة يمكن سعادتك مش بتفضلها، بس احنا طمعانين في إنك تزود على خدماتك لينا خدمة كمان.. أصل بيقولوا السجن والحبس صعب، طبعًا مش بصعوبة إنك تكون رئيس جمهورية مسؤول عن شعب كامل، بس إنت أسد قدها وقدود وهم يدوبك شباب ضعفاء هشين”.
وأردف: “لو ماطلعتهمش برضه تكون مشكور، وأكيد عندك حكمة مش عندنا، وأكيد طلبي ده فيه قصر نظر أو احنا غلطانين في تعاطفنا مع من لا يستحق التعاطف”.
وختم رسالته: “ولو في انحطاط وتملق ورياء ممكن نوصله أكثر من كده وممكن يخلي الشباب دول يطلعوا ويناموا في بيوتهم مع أهاليهم احنا مستعدين.. إنت بس شاور”.