يعاني اهالي حي المنزلة الجديدة ، بمحافظة الدقهلية من انفجار مواسير الصرف الصحي بشكل دائم وغرق الشوارع ، اشتكي السكان للمسؤولين دون جدوى.
يقول احمد عبد السلام : لازم يشوفو حل للمواسير دي تقريبا الحكومة شارية مواسير من الرخيصة ومضروبة ولما بيحصل انفجار بيلحمو المواسير مش بيغيروها ! واشتكيت المجلس اكثر من مرة في الموضوع ده لكن للاسف دون جدوي .
ويعلق السيد عبد القادر : انا بنتي عندها خمس سنين عندها حساسية ولما بتشم رائحة المجاري دي بتتعب وبوديها للدكتور وبتاخد علاج باستمرار وسيادة المسؤولين قاعدين في بيوتهم مكبرين دماغهم ! عاوز اسال واحد منهم لو حد من ولادك تعب بسبب المجاري هتعمل ايه ؟ .
وأضاف محمد البدراني : الدراسة علي الابواب ومع ذلك لسة المشكلة متحلتش مش عارف نعمل ايه اكتر من كدا عملنا شكوي جماعية وقدمناها للمجلس ووصلنا واحدة للمحافظ لكن دون جدوي .. هما مش فاضيين يشوفوا شغلهم انما يقتلوا الناس في بيوتهم ..
وتقول ام احمد : انا بطالب باقالة المحافظ وكل العاملين بمجلس المدينة كلهم شوية حرامية محدش بيعمل لصالح البلد كله عاوز فلوس وخلاص نزود مرتبات الجيش والقضاء انما نحل مشكلة لا .. ربنا يخدهم .
