غلاء الأسعار، أزمة تواجه المواطن، وتضطره إلى الاستدانة من الآخرين..
في جولة لـ”رصد” في أسواق حلوان، تقول أم ندى: “أنا بطلت اجيب سمك عشان بحب أعصر عليه ليمون، وكيلو الليمون وصل لـ30 جنيه، هوا المرتب فيه كام 30 جنيه يعني”، وأضافت عزيزة السيد، “أنا بصرف في الأسبوع 200 جنيه على الخضار بس، وبكون ماسكة نفسي في المصاريف، وده من غير لحوم، مع إن أسرتي 3 أفراد بس أنا وجوزي وبنتي”.
وتابعت سعاد علي: “يوم ما بنزل السوق أقل حاجة بصرف 100 جنيه من غير لحمة ولا فراخ، دلوقتى عشان الواحد يطبخ وجبة متكاملة هتتكلف مش أقل من 100 جنيه في اليوم باللحوم، لإن كيلو اللحمة وصل لـ80 و100 جنيه، وكيلو البامية وصل لـ50 جنيه، هنجيب منين الفلوس دي، وطبعًا معظم الأيام ناكل الأكل البايت ومش لازم ناكل لحوم كل يوم“.
ويقول فهمي السيد، بائع: “غلو الأسعار بيؤذينا احنا كمان عشان الحركة في السوق قلّت وقليل اللي بيشتروا، الحركة زادت على سوق الهدوم أكتر عشان ماغليتش”.
ويقول بائع ليمون عن سبب غلاء سعره: “مش قادر أحط ورقة بالسعر، خايف الزباين ميقربوش، سعر اللمون زاد عشان مافيش لمون على الشجر أصلًا، وبقوا بيصدروه بره، اللمون دلوقتي أغلى من المانجا، ده كان قبل رمضان وصل لـ35 جنيه دلوقتي رخص بقى بـ26 جنيه“.
