يعاني أهالي مركز الجمالية بمحافظة الدقهلية، من انقطاع متكرر لمياه الشرب، استمر لأكثر من 20 يومًا، حتى في هذا الشهر الكريم، ما أدى إلى تجمهرهم أمام الوحدات المحلية لتقديم شكوى للمسؤولين.

وكان رد الموظفين “مفيش ميه اعملوا اللي تعملوه”، وذلك على مرأى ومسمع من أهل القرية، كما تقدموا بشكوى إلی رئاسة مركز ومدينة الجمالية، وتجمعوا أمامها وكان ردهم “هنشوف وربنا يسهل”.

ولكن الواضح أنهم لا شافوا ولا ربنا سهل.. هكذا يقول “عبده” أحد أهالي القرية، مضيفًا “نعمل إيه أكتر من اللي عملناه هنروح لمين تاني حسبي الله ونعم الوكيل، طول عمر الجمالية واقعة من خريطة المحافظة علشان نجيب المية بس نشرب وناكل ونعيش منها يطلعوا عنينا”.

وتقول “فاطمة” ربة منزل: “بنغسل الحاجة من الترعة الملوثة لأن مش أدامنا طريق تاني غير كده ومش لاقيين ولا نقطة مية علشان نطبخ وننضف ونعمل شغل البيت وبنرجع نعاني من أمراض مزمنة ولا حد مهتم ولو موتنا بردو محدش هيهتم”.

ويقول “فتحي”: إن عربات الوحدة المحلية المخصصة لتجميع القمامة تقوم برمي القمامة بمجاري المياه بدلًا من تجميعها وبالتالي حتى لو وصلت المياه فإنها تصل ملوثة وأن هذه مشكلة منذ القدم يتسم بها مركز الجمالية من تلوث المياه إن وجدت.