يعاني أهالي قرية الضهرية، بمركز ايتاي البارود، من انتشار برك ومستنقعات المجاري وسط شوارع القرية، مما يؤدي إلى تعطل المواطنين عن الكثير من اعمالهم اليومية، فضلًا عن انبعاث الروائح الكريهة والتى لا تفرق بين الكبار أو الأطفال.
وبسؤال المواطنين عن المشكلة، قالت الحاجة سامية عطا الله، بائعة خضار، “الشوارع غرقانة في المجاري ومش عارفين نمشي، وأنا ست كبيرة بنزل السوق بعربية كارو، وساعات كتير الحمار بيغرس بالعربية مني وابقى محتاسه والخضار بيتبهدل مني، ولما اتصلنا بالمسئولين طنشونا”.
وقال عبد الحميد الطويل، “عملنا مذكرة لمجلس المدينة عشان ينضفوا المجاري دي ولا حياة لمن تنادي”، وأضافت أحلام طلبة، طالبة جامعية، “أنا بخرج الصبح اروح الكلية ووقعت قبل كده مرتين بسبب المجاري، وبسببها بغيب من الكلية عشان اروح البيت واغير هدومي واتاخر وبيفوتني محاضرات منهم لله”.
وقال سعيد عبيد، “الشوارع ريحتها وحشة وغرقانة ميه، وعيالنا صغيرين بيلعبوا في الشارع وبيبهدلوا نفسهم في الطينة، وبيجيلهم أمراض ولما بعتنا فاكسات محدش يعبرنا”.
وقال محمد حمدان، مدرس، “أنا روحت بنفسي لشركة مياه البحيرة في دمنهور، وقدمت شكوى وبرده مفيش أي إجراء تم وكان قبلها قدمت شكوتين في مجلس المدينه وبردو محدش عبرنا ومشعارفين نمشي والله في الشوارع من الريحة”.
