أغرقت مياه الصرف الصحي شوارع قرية الجرادات بمركز أبو حمص بالبحيرة، ووصلت إلى داخل المنازل لتغرقها، حيث رصدت كاميرا رصد عددًا من الشوارع الغارقة بمياه الصرف الصحي، وكذلك مداخل لعدد من المنازل تغطي أرضيتها مياه الصرف الصحي، وسط إهمال من الحكومة واستغاثات من أهالي القرية .
وتم رصد عدد كبير من أكوام القمامة بعدد من شوارع القرية، وصورًا لأكوام من القمامة حول المنازل، كما تم رصد اتتشار مياه الصرف الصحي في الشوارع وداخل المنازل.
يقول سعيد علي، أحد سكان القرية، “زي ما أنت شايف، الزبالة في كل حتة ومجلس المدينة مش بيشيل أي حاجة، ومياه المجاري دخلت علي الناس البيوت”، وبسؤاله عن موقف الحكومة من الظاهرة، أجاب قائلًا: “حكومة ايه بس؟ الحكومة تبص للي في الساحل اللي في شرم، إنما احنا بيدونا بالجزمة”.
وأضاف حسن علوان، “المجاري غرقت البيوت والعيال الصغيرة كلها تعبانة، وكل يوم نبعت لمجلس المدينة ونبعت للمحافظ وللدنيا بحالها، ومحدش بيرد ولا حد بيعبرنا، ولا حتى جاتلنا عربية تشيل المجاري دي، ولا حتى عربية زبالة تشيل الهم اللي مغطي الشوارع وضهور البيوت ده، والسيسى كل يوم يتكلم عن الفقرا، ولا شفنا اهتمام بالفقرا ولا حاجة، كل يوم زيادة في الأسعار ومجاري وزبالة، ادي اللي خدناه”.
وأعرب محمد صلاح، عن غضبه مضيفًا: “احنا مش بنطلب يا عالم غير اننا نعيش زي البنى أدمين، كتير علينا؟؟، ملّينا شكاوى وطلبات وفاكسات ورسايل!!! ومحدش بيرد ولا بيعبرنا”.
بينما أضاف “م.أ”، طبيب: “دى كارثة ومصيبة وجريمة في حق البشرية، البيئة دي مناسبة لكل أمراض الدنيا إنها تنمو في الوسط الملوث دة، مفيش ولا فرد هيكون سليم ولا طفل هيطلع سليم”، وتابع متسائلًا: “إزاي ده هيقدر يشتغل وهو موبوء بالأمراض كدة؟ إزاي البني أدم ده هيفيد البلد وهو اتربى وسط القاذورات؟ الأمر يحتاج لتدخل عاجل وفوري وسريع لانقاذ آلاف من البشر من الأمراض الموبوءة والمعدية”.
