تسود حالة من الغضب وسط أهالي ايتاي البارود بالبحيرة، بسبب انتشار مواقف التكاتك والسيارات أمام المستشفى العام، مما يجعلهم غير قادرين على الوصول بسهولة للمستشفى, فيما يرد أصحاب التكاتك والسيارات: عايزين ناكل عيش !!
يقول محمد خليل، موظف بالمستشفى، “كل يوم الصبح بكون موجود هنا في الشغل منظر يقرف بصراحة شتيمة وقرف بين سواقين التكاتك، ودول عيال لسانهم طويل والحكومة مش فاضية غير إنها تقبض ع الإخوان عندنا وسايبين دول يقرفوا فينا “.
فيما أضاف سعيد زينهم، حلاق، “دول شوية عيال واقفين طول النهار يعاكسوا بنات واللي رايحة واللي جاية ومعطلين الطريق”.
وقال خالد ربيع، صيدلي، “المشكلة مش في وجود التكاتك والعربيات انما المشكلة الكبيرة في عدم التنظيم المفروض دول يتعمل لهم موقف منظم عشان يشتغلوا وياكلوا عيش، بس والله العيال دي غلابة ومحدش سائل فيهم”.
فيما قال طبيب بالطوارئ بالمستشفى رفض ذكر اسمه، “أنا عشان اقول التكاتك يمشوا من المكان ده لازم أوجد حل بديل, لكن مش المفروض أنا اللي اقول الحل ده، المفروض فيه حكومة في البلد تنظم الكلام ده وبصراحة ده مش منظر حضاري”.
وبسؤال المرضي داخل المستشفي قال عبد الجليل أيوب “أنا راجل كبير عندي 60 سنة بتابع هنا في المستشفي دايما بقيس الضغط والسكر، وعشان ادخل المستشفى، التوكتوك بينزلني بعيد بسبب الزحمة ومبقدرش امشي علي رجلي بس ببقي مضطر وعلي مابمشي الشوية دول بكون تعبت أكتر”.
وبسؤال أصحاب السيارات والتكاتك عن تواجدهم في هذا المكان قال أمير سعدالله “يابيه الزباين هنا كتير اللي مخيط وتعبان واللي بيكشف على حد معاه واللي عامل حادثة، والناس تعبانة، واحنا عايزين ناكل عيش وده أحسن مكان نقدر ناخد منه زباين”.
