بدأت اليوم الأحد، الحملة القومية للتطعيم ضد مرض شلل الأطفال والتي تستمر لمدة 3 أيام، تقوم فيها فرق التمريض بالانتشار في معظم أماكن الجمهورية لتطعيم الأطفال، بالإضافة إلى الوحدات الثابتة للتطعيم.

وقال مصدر طبي في مديرية الصحة بالفيوم، لشبكة “رصد” الإخبارية، إن مرض شلل الأطفال لم يظهر منذ 7 سنوات في مصر، مؤكدًا أن الحملات المتتالية تهدف إلى منع ظهوره مستقبلًا، وأن الوزارة جعلت عدد الجرعات مرتين في السنة بدلًا من ثلاث.

وعن عدد الممرضات المشاركات في الحملة، أوضح المصدر الذي فضل عدم ذكر اسمه، أن عددهن يبلغ ألف ممرضة مقسمات على مجموعات، مشيرًا إلى استعانة المديرية بطلبة التمريض لتدعيم بعض المناطق.

وقالت ممرضة مشاركة بالحملة تدعى عزة مصطفى، إننا “نخرج 3 أيام كل يوم من الساعة 6 صباحًا لغاية الساعة 5 وفي الآخر المقابل بيكون ضعيف جدًا.. أنا باخد في اليوم الواحد مكافأة 30 جنيها يعني الثلاث أيام 90 جنيها! يرضي مين ده وأنا بافضل ألف طول اليوم كده، بالإضافة إلى أنه مافيش وقت راحة في اليوم لازم أشتغل الفترة كلها دون توقف لو ارتحنا، وعدى علينا المفتش بيعمل فينا تقرير”.

وأكدت زميلتها هناء راضي أنه “لا يوجد اهتمام خالص بفرق الممرضات اللي بتنزل علشان أنا أنزل جايبين لينا واجبة جافة شيبسي وبسكويت وعصير، وأنا شغالة حوالي 10 ساعات وممنوع عليّ الراحة كتير جدًا، ولو اعتذرنا عن النزول يتكتب فينا شكاوى ومذكرات، وأننا امتنعنا، وبعد كل ده أقبض مكافأة عن الثلاث أيام 90 جنيها أعمل بيهم إيه؟”.

وأوضحت أخرى تدعى “أم عبد الله”، أن مكلفة بـ”أني أخلص 80% من منطقتي في يوم واحد، وممكن تكون المنطقة كبيرة ومعايا ممرضة ماعندهاش خبرة في العمل ده غير مواقف مش كويسة بنتعرض ليها من الناس، وفي الآخر مافيش تقدير من الوزارة لينا والمسؤولين عن الحملة بييجوا يتصوروا معانا، وبعدين يمشوا علشان ينزلوا صورهم في الصحافة أنهم اشتغلوا وعملوا”.