قامت إدارة الجامعة الألمانية بفصل الطالب عبد الرحمن الجندي، المضرب عن الطعام منذ 13 يومًا.
وبحسب حملة "جبنا آخرنا" المعنية بالمتابعة الإعلامية للمعتقلين المضربين عن الطعام، كانت أسرة الطالب عبد الرحمن الجندي قد توجهت لإدارة الجامعة لعمل طلب بحذف العام الدراسي الحالي له "season drop"، وهو حق من حقوق الطالب، فقامت الإدارة برفض الطلب وطالبت الأسرة بالحضور لسحب ملف عبد الرحمن من الجامعة.
يذكر أن "الجندي" يبلغ من العمر 19 عامًا، كان من المفترض أن يدرس الهندسة بالجامعة الألمانية، تم اعتقاله هو ووالده يوم 6 أكتوبر 2013، وحُكم عليه بالحبس 15 سنة، بدأ إضرابه عن الطعام يوم 4 أكتوبر الجاري.
رسالة من عبد الرحمن الجندي من داخل المعتقل:
في يوم السادس من أكتوبر 2013، في معسكر السلام، كنت خايف يفوتني أول أسبوع في الجامعة، بعدين أيمن قالي متخافش، أول أسبوع ده بيبقى Lecture Week، لغاية دلوقتي أنا خايف يفوتنى الـ Lecture Week، بس بتاع السنة اللي بعدها.
في يوم السادس من أكتوبر 2013، صلينا قيام ليل كلنا، بعدها واحد تساءل بسخرية "مين بقى اللي هيصلى بينا التراويح في رمضان؟!" وضحكنا كلنا لأن ذلك بالطبع شيء مستحيل الحدوث؛ احنا فين ورمضان فين، وبعدين أكيد هيطلعونا عشان معملناش حاجة.
يوم وقفة عيد الأضحى قلنا أكيد هيطلعونا عشان العيد، أكيد مفيش قسوة وتبلد لدرجة إنك تبعد ناس عن أهلهم في العيد، بالذات وانت متأكد إنهم معملوش حاجة، دلوقتي برضه لسه بنتساءل لو ممكن يعملوا عفو في العيد، بس عيد الفطر.
أول ما اتحبسنا كنا بنقول تخيلوا لو خدنا حكم سنة ولا حاجة ولبسنا أزرق، ونضحك؛ عشان طبعًا ده مستحيل، دلوقتي بندعي ربنا مناخدش إعدام.. أول ما اتمسكت كنت مرعوب تفوتني أول سنة في هندسة.
دلوقتى مش عارف هعرف أدخل كلية من الأساس ولا لأ، أول ما اتمسكت كنت بحب مصر، دلوقتي لسه بحبها.. بس هى اللى مبتحبنيش.
